Taller d'Elaboración de Cerveza Bayura

Direión: Llagar Panizales - Espinéu (Mieres)

Teléfonu: 985 457 815 / 618 134 034

http://www.llagarpanizales.com/

http://www.facebook.com/ipacerveceria

http://www.serxusolares.es/

www.bayura.es

                                                          

Recomendaciones: Comida Tradicional Asturiana

Calidá: 3/5

Preciu: 50€

Comentarios: Perbon entamu de Serxu Solares, dueñu de Ipa La Cervecería del Millón de Ibus, asitiada nel paséu de la Playa San Llorienzu de Xixón. Serxu ye ún de los pocos artesanos de la cerveza n'Asturies, y tamién d'otres bebides coles que ta continuamente esperimentando.
Entamamos el Taller 15 presones a les 10 de la mañana, había munchu trabayu per delantre col oxetu de facer la nuesa propia cerveza pa deprender too'l procesu. Fizose nes instalaciones de la micro-cervecería artesanal Bayura que ta asitiada nel Llagar Panizales, n'Espinéu, enriba Mieres.
Serxu espliconos perbien too'l procesu y fuimos nós los que tuvimos faciendo'l trabayu pa que la cerveza daveres fora nuesa.
Nun parón pola "cocción" de la grana, ficimos una espicha con Sidra Panizales, tortiella, chorizos de gochu asturcelta a la sidra y xamón de gochu asturcelta. Un gran descubrimientu el Gochu AsturCelta. Tienru, con sabor afayaizu. Tien munchu futuru.
Vuelta al trabayu y visita pol llagar, enseñándonos tamién el procesu pa facer la sidra y parándonos a probar la variedá de Sidra de Xelu (cola marca Orbayu y tamién Panizales) que faen nel llagar. Ensín dubia, lo meyor que probé en munchu tiempu. Si podéis facevos con unes botelles, va pagavos la pena.

Pa xintar,subimos a la zona restorán que tien el Llagar. Entamó llegar xente abondo, tamién ye verdá que taba el día soleyeru p'averase, polo que quiciabes seya meyor llamar pa reservar.
Xintamos Pote Asturianu, con compangu de gochu asturcelta. Perbono, ensín pallabres, nun quedó nada na pota, y mira que yera de les grandes.
De segundu, Picadiyu de Gochu AsturCelta con pataques y Güevos de les pites que taban un pocu más p'allá. El picadiyu increíble, suave pero con un pocu de picantín, como más me presta.
Y de postre, arroz con Llechi caseru. Nun lo pudi finar, nun porque nun taba bonu, pero ye que ya nun daba pa más. Gustome muncho.
Pa beber, tomamos Mexu de Trasgu, cerveza artesanal fecha por Bayura. Una doble IPA amarga que fae les delicies de los cerveceros.

Dempués de xintar, y fináu el procesu d'enfriamientu de la cerveza, metísmosla nel tanque pa que fermentara, y dientro d´un mes y mediu, tendrémosla'n botella pa prebala.

Ye una esperiencia perguapa de facer, amás de deprender un mundiu apasionante como ye'l de la xente qu'investiga ya intenta facer coses distintes por mor del caltenimientu de les tradiciones investigando nuesves formes d'espresión.

Pa tolo que ficimos, xintamos y bebimos, paeciome baratu.